Pitong Bagay na Ginagawa ng mga Lalake na Kinaiinisan ng mga Babae

Lingid sa kaalamn nating mga kalalakihan ay may mga ginagawa tayong mga lalake na labis na kinaiinisan ng mga babae. Magugulat na lamang tayo manlalamig sila sa atin. Alam mo ba kung bakit? Kasi may mga ginagawa tayong mga lalake that piss them off. Nag-survey ang team ng “TripBreaker” at naka-kalap kami ng pitong mga bagay na ginagawa ng mga lalake na nagpapakulo ng dugo ng mga babae. And here are those seven;

Pagsisinungaling. Ika nga eh, “Honesty is the best policy”. Importante sa mga babae ang katapatan ng isang lalake sa relasyon at kung masisira ito, napakahirap nang ibalik. Kaya kailangan maging totoo ang isang lalake sa bawat pagkakataon. Sabihin kung saan talaga pupunta, sino ang mga kasama o kung ano ang tunay na nararamdaman. Nang sa ganun ay nauunawaan ng mga babae ang tunay na sitwasyon ng mga lalake. Ang problema sa mga lalake, ang hihilig magsabi ng “basta”, “OK lang” o kaya “wala ‘yon!” yun pala’y may problema na. Kaya mga lalake, number one rule: Always as in always say the truth.

Pagsasabi ng totoo. Maramdamin ang mga babae. Minsan ang mga sinasabi nating mga lalake ay nakakasakit ng kanilang damdamin. Halimbawa tatanungin ng babae kung bagay ba sa kanila ang bagong hairstyle nila, walang habas natin itong sasagutin ng “Ang panget! Ano ba ‘yan?! Buhay pa ba gumupit sa’yo?” Hindi natin alam nasasaktan sila sa mga katotohanang sinasabi natin. Huwag ka naman masyadong totoo, pare. Nakakasakit ka ng feelings eh. Alam mo namang feelings ang pinakasensitibong bagay sa mga babae. Kaya pag-aralan kung paano natin hindi masasaktan ang kanilang damdamin. Matuto tayo ng “The Art of Lying”. In other words, "Magsinungaling ka!".

Pagiging madaldal. Likas sa mga babae ang pagiging madaldal. Pero kung ang lalake na ang nagsimulang maging maingay sa relasyon, aba eh medyo mag-isip-isip ka muna; baka you are really a woman trapped in a man’s body. Dapat ang lalake ay minsanan lang magsalita. Trabaho ng mga lalake ang makinig lang sa mga babae. Yes, minsan walang kwenta ang mga reklamo at issues nila pero dapat handa kang makinig… palagi. Because the guys are the girls’ shock absorber. A listening ear is all that the girls need in a relationship.Kaya Guys, shhhhh! Quiet! Shut up! You're helping them a lot.

Pananahimik. Kahit sino namang tao siguro maiinis kapag salita ka ng salita pero yung kausap mo wala man lang ni ‘ha’ ni ‘ho’. Isa rin sa mga kinaiinisan ng mga babae ang pananahimik ng mga lalake. Aba’y magsalita ka naman! Binigyan ka ng bibig para gamitin. Wala ka bang opinion? Magkwento ka kahit ano? How will girls find out what’s in your mind kung tatahi-tahimik ka diyan? Come on! Speak up! Daig mo si Maria Clara. Dumaldal ka naman! Girls just can’t stand quiet men. Sorry. Iiwanan ka ng mga babae pag ganyan ka. Gusto ng mga babae ang lalakeng may kwento, lalakeng makwento.

Pagiging ambisyoso. Arrogant. Yung kung mangarap eh akala mo kung sinong magaling. Hambog. Ayaw din ng mga babae niyan. Boy, dapat alam mo kung ano lang ang kaya mong abutin. Huwag kang maghangad ng hindi mo naman kaya. Konting inom din ng kape para nerbiyosin ka naman. Girls like guys who are humble. 

Kawalan ng pangarap. Ito pa ang isa sa mga kinaiinisan ng mga babae. Ang lalakeng wala o ayaw man lang mangarap. Ano? Hanggang ganyan ka na lang? Wala ka bang ambisyon? Wala ka bang tiwala sa sarili mo? Gusto kasi ng babae ‘yong matapang. Yung may ‘angst’. Yung tipong kahit ang dami nang hindi bilib sa iyo patuloy ka pa ring lumalaban. Yan yung mga hinahangaan ng mga babae; guys who don’t get easily disheartened. Dream on man, yeah!

Pagiging malabo. Ito ang pinaka-kinaiinisan ng mga babae sa lahat. Ang pagiging malabo nating mga lalake. Itigil na natin itong ganitong klaseng pag-uugali. Huwag tayong maging malabo. Huwag tayong “sala sa init, sala sa lamig”. Sabihin natin kung ano talaga ang gusto nating mangyari para hindi nalilito ang mga babae sa atin. Kaya nauuwi sa hiwalayan ang mga relasyon dahil sa kalabuan nating mga lalake. Nalilito tuloy ang mga babae sa atin. ANG LABO KASI NATIN. TAYO TALAGA ANG MALABO. Ay si-ya.